شاب يوجه رسالة إلى جلالة الملك .. والناشطون يطلقون هاشتاغ #حقه_يقابل_جلالة_الملك
شاب يوجه رسالة إلى جلالة الملك .. والناشطون يطلقون هاشتاغ #حقه_يقابل_جلالة_الملك

سيدي صاحب الجلاله الملك عبدالله الثاني بن الحسين انا المواطن البسيط المسجل ضمن سجلات الاحوال المدنيه باسم عدي عبدالقادر سراج الكباريتي و صاحب الرقم الوطني 9891049942 سيدي انا ما عندي مشاكل غير اني بحب بلدي كثير فقررت اسافر برا الاردن ادور ع شغل عشان حلمي انه يكون الي بيت و عشان اقدر اتجوز البنت الي خطبتها بعد ما نشف دمي و انا بجمع مصاريف الخطبه البسيطه، سيدي انا تخرجت من الجامعه حلمي اكون اصغر رئيس وزراء بالاردن و كان نفسي يكون اكبر وزير عندي عمره 29 سنه و اكون قريب من الشعب و امشي بينهم بدون حرس لانه شعبنا لو حب شخص بحميه بروحه، سيدي و انا قربت انسى الحلم هذا لانه اقصى طموحي صار اني الاقي شغل يعيشني بكرامه.

 

سيدي من حبي للبلد اشتغلت بمبادرات ما همني لا شهره ولا اكون معروف زي غيري سيدي كان همي اغير بشباب هالبلد للاحسن و اخلي همهم يخدموا و يساعدوا الناس و المجتمع الي هما فيه و كان فريقنا ولا زال اسمه #نشامىHKJو بدل ما نندعم سيدي من الشركات الخاصه لانه هذا الفريق بكل مبادراته من مصروف الشباب و جيب اهلها و لانه نجح صارت اكبر الشركات تعرض انه الفريق يكون تحت رعايتها مقابل انه ياخذوا الاسم، طبعا سيدي كلها شركات خاصه بتحب الوطن و بتحب تسرق كل شي ناجح لحتى يلمع اسمها التجاري، و الحمدلله سيدي رفضنا لانه احنا مش رخاص نضيع تعب شباب اردني خالص بالفكر و التنفيذ و الماده عشان يجي واحد من المدراء التنفيذين يحط اسم الفريق تحت اسم شركته الكبيره و من وقتها سيدي فش شركه الا طلعت فريق تطوعي و جهه مسؤوله عن التطوع، لا و صرنا محاربين بكل الطرق و صار اقل موافقه حكوميه او لقاء مع مسؤول عشان نجهز مبادره بده مليون واسطه.

 

كان نفسي يا سيدي يكون في هيئه تحمي هالمبادرات و تسجل فيها و تراقب عملها و اي مبادره ناجحه تلزم الهيئه الشركات الكبرى بالاردن على دعمها بدل ما الشركات تطلع مبادرات لتظهر اسمها التجاري و تدمر الجهود و الطاقات الشبابيه و تعمل افكارهم بشكل مطور على مليون مره لان معهم مصاري.

 

سيدي انا من الجيل اللي انظلم و اندعس عليه و تدمر طموحه سيدي انا من الجيل اللي الفساد دمر حقه بالعمل و البورصه و الضرايب و رفع الاسعار، ضيعوا اللي بجيب ابوي و اخوي و جدي, سيدي انا من الجيل اللي لو ابوه مش ماسك منصب بالبلد حقه ضايع, سيدي انا من الشباب الي بحياتهم ما رح يخلوني اقابلك بأي مكان لانهم يمكن هما بجيبوا اللي بلقنوه الكلام و بخاف يزيد عليه كلمه زياده او بجيبوا اللي وضعه مرتاح او اللي الهم مصلحه عنده او عند ابوه او عمه او خاله.

سيدي انا من الجيل الي ذاق الويل و طلع ضد الفساد يهتف و انا من الجيل الي طلع ضد النظام و بنفس الوقت كان من جوا واعي و عارف انه انت سيدي صمام الامان, يمكن احنا ما خفنا نحكي لا للفساد بس صدقني سيدي خوفنا عالبلد كان اكبر و حبنا الك كان اكثر و اكثر.

 

سيدي انا بحلم حلم اني بيوم اقابلك بحلم كنت اني احلف قدامك اني احافظ عالبلد و افديها بدمي, و صار حلمي اني اشوفك و احكيلك قديش في شباب عندهم طموح و طموحهم اختفى لانه مافيه الهم ظهر ولا سند, سيدي ليش دائما في خطط مستقبليه و ليش ما في خطط حاليه بالذات للبطاله سيدي معقول في 15,3% عاطل عن العمل بالاردن بضلوا يعدوا ايام حياتهم بدون فائده ولا تطور ولا شي ملموس بس بيعملوا بحياتهم غير انهم عايشين!!!!

 

سيدي لما حكولي تطلع تشتغل بدبي انبسطت و من جواتي وجع لاني بدي اترك بلدي طلعت ع راتب مش كثير كبير كان فريق العمل بالشركه 4 فجأه لقيت حالي لحالي و بعد اقل من شهر بنطلب مني اقدم استقالتي او بيجيني انهاء خدمات لانه ما قدرت اكون اله و امشي شغل 4 اشخاص سيدي و لاني مرضت و صابتني حساسيه و انا مش مأمن لسا و العلاج تكاليفه كبيره هون سيدي و قديش الراتب يا دوب يكفي اكل و شرب اصلا و سكن سيدي انا عشان اقدر اعيش ساكن مع 28 واحد بشقه وحده بنستنى عالدور بالحمام و الغساله بنستغل اي فرصه عشان نغسل و ما الك بالبيت الا فرشتك تتحكم فيها و كل هذا عشان يمكن الاقي بالامارات فرصه احسن من بلدنا الي طلعت منها غصب عني ادور على لقمه عيش كريمه.

 

سيدي يمكن انت ما رح تشوف الرساله بس انا حكيت الي بقلبي و كنت حاب تسمعني عشان هيك كتبتلك هالحكي والله يا سيدي انا بس بدي حياه كريمه مش اكثر و بدي انا البنت الي حلمت انها تصير شريكه حياتي نتجوز و يلمنا بيت و سياره صغيره نقضي حاجاتنا فيها و شغل يعيشني مستور.


سيدي انا اسف اخذت من وقتك بس كنت بحلم و مات الحلم بداخلي كنت بتوجع و المشكله وجعي هو وجع وطن بحاله شبابه بعدوا الايام بدون فايده, صار يحس انه السياره الملك حلم و الزواج مستحيل و البيت الملك خيال و الشغل وهم و سراب قتل كل حلم كتبته بهل رساله و هو بالاساس حق الي و الهم..

 

سيدي معقول يجي يوم اقابلك!!!

معقول يجي يوم و الاقي شغل برا البلد و احقق احلامي البسيطه!!!

معقول يجي يوم سيدي ارجع للبلد عشان جايني شغل احسن من الي انا فيه!!!

سيدي معقول جد رسالتي توصلك و تقراها سيدي!!!!

معقول #حقنا_نقابل_جلالة_الملك

الامان بالله و فيك سيدي ابو حسين.

و السلام عليكم و رحمة الله و بركاته -

2017-04-22
أضف تعليق
الاسم
الايميل
التعليق
تعليق صوتى
رفع ملف صوتى
لم يتم رفع اى ملف
( الملفات المسموح بها امتداد wma , rm , mp3 )
عدد الزيارات :